Vazirlar Mahkamasi 2024-yil 16-iyulda 425-son «Ichki poyezdlarda yo’lovchi tashish xizmatlarini ko’rsatishda yuzaga keladigan zararni Davlat byudjeti hisobidan qoplash tartibini tasdiqlash to’g’risida»gi qarorni qabul qildi.
Prezidentning 2023-yil 10-oktabrdagi PQ-329-son «O’zbekiston Respublikasi temir yo’l transporti sohasini tubdan isloh qilish chora-tadbirlari to’g’risida»gi qaroriga muvofiq, 2025-yil 1-yanvardan mahalliy yo’nalishlarda yo’lovchi tashish xizmatlarini ko’rsatishdan yuzaga keladigan zararlarni qoplash tartibi joriy etiladi (tezyurar va tezyurar ekspress poyezdlar bundan mustasno).
Qayd etilishicha, 2024-yil 1-yanvardan yuk vagonlari, konteynerlar hamda tezyurar va ekspress poyezdlarda yo’lovchi tashish xizmatlari tariflarini davlat tomonidan tartibga solish amaliyoti bekor qilinib, bozor tamoyillari asosida tartibga solishga o’tiladi.
Hujjat bilan ichki poyezdlarda yo’lovchi tashish xizmatlarini ko’rsatishda yuzaga keladigan zararni Davlat byudjeti hisobidan qoplash tartibi to’g’risidagi Vaqtinchalik nizom tasdiqlandi. Unda quyidagi tartiblar belgilangan:
- tashuvchilarning ichki poyezdlarda yo’lovchi tashish xizmatlarini ko’rsatishdan ko’rgan zararlarini hisoblash;
- ushbu zararlarni Davlat byudjetidan qoplash masalasini ko’rib chiqish;
- qoplash so’rovi uchun zarur hujjatlarni taqdim etish.
2025-yil 1-dekabrga qadar temir yo’l transporti sohasida davlat tomonidan tartibga solinadigan xizmatlar narxlarini belgilash va tasdiqlash tartibi ishlab chiqiladi. Shuningdek, xizmat ko’rsatish sifati va operatsion samaradorlikni oshirishga qaratilgan rag’batlantirish (bonus) mexanizmlari hamda oldindan to’lov metodikasi joriy etiladi.
2026-yil 1-iyulga qadar ichki temir yo’l yo’nalishlarida yo’lovchi tashish xizmatlari bo’yicha Jamoat xizmatlari to’g’risidagi shartnomalarni tuzish va moliyalashtirish tartibi loyihasi ishlab chiqiladi.
2027-yildan boshlab Davlat byudjetidan qoplash mablag’lari faqat ichki yo’nalishlarda yo’lovchi tashish xizmatlari bo’yicha shartnomalar asosida ajratiladi.
