Prezidentning 2024-yil 10-iyuldagi PF-100-son «Byudjet mablag’laridan foydalanish ustidan moliyaviy nazoratni kuchaytirishga oid qo’shimcha chora-tadbirlar to’g’risida»gi Farmoni qabul qilindi.
Byudjet mablag’larini tasarruf etuvchi vazirlik va idoralarda ichki audit tizimini takomillashtirish, shuningdek davlat byudjeti mablag’laridan samarali foydalanish ustidan jamoatchilik nazoratini kuchaytirish maqsadida:
- Hisob palatasi O’zbekiston konsolidatsiyalashgan byudjeti ijrosining tashqi auditini o’tkazadi va natijalari bo’yicha tegishli xulosalar tayyorlaydi.
- 2025-yildan boshlab davlat ulushi 50 foiz va undan yuqori bo’lgan yirik tashkilotlarda audit o’tkaziladi.
- Strategik audit va axborot texnologiyalari auditi joriy etiladi.
- 2024-yildan boshlab barqaror rivojlanishning milliy maqsadlariga erishishga qaratilgan dasturlarning amalga oshirilishi har yili baholanib, hisobotlar Prezident va Qonunchilik palatasiga taqdim etiladi.
Baholash strategik islohotlar, davlat dasturlari va aholining ijtimoiy himoyasiga qaratiladi.
Qoraqalpog’iston byudjeti va mahalliy byudjetlarning tashqi auditi natijalari Jo’qorg’i Kenes hamda xalq deputatlari Kengashlari yig’ilishlarida muhokama qilinadi.
2025-yildan Iqtisodiyot va moliya vazirligi Davlat byudjeti va maqsadli jamg’armalar mablag’larining taqsimlanishi to’g’risida ma’lumot taqdim etadi.
Bundan tashqari, byudjet mablag’larini tasarruf etuvchilar moliyaviy risklar ro’yxati va ularni kamaytirish chora-tadbirlarini taqdim etishi shart.
2025-yil 1-yanvardan davlat ulushi bo’lgan yirik tashkilotlarda risklarni boshqarish qo’mitalari tashkil etiladi; ularning ishchi organi sifatida ichki audit xizmatlari faoliyat yuritadi.
Ichki audit xizmatlari Vazirlar Kengashi va hududiy hokimliklar tarkibida ham tashkil etiladi.
Hisob palatasining belgilangan shtat birliklari doirasida quyidagilar tashkil etiladi:
- Idoralararo masofaviy nazorat markazi;
- Mudofaa kompleksi xarajatlari auditi sektori;
- Xalqaro standartlar asosida davlat auditi sektori;
- Ilmiy-o’quv markazi.
